Eski Sithanen Enn Kosmar Pu Popilasyon?

Kestyon bet, non? Kosmar disparet ler uver lizye. Parkont lanfer so bann politik ekonomik kontinye fer u lavi vinn margoz pandan buku banane. Sithanen finn reponn a sa kestyon la resama avek kat kestyon. Anu analyz zot.

1. Linn dimande si pa enn politisyen de long dat kuma Ramgoolam ti pu pran enn risk vinn tir li depi kot liete si li tienn kosmar. Anfet Ramgoolam pe pran enn mari gro risk reprezant Sithanen kom minis de finans apre sa bann gro gro dal ki linn fane ant 2005 ek 2010 (nu tu finn remarke ki lalyans pep tuni pann gagn sa kantite plis dimunn ki lalyans papa piti dan miting nasyonal le duz oktob). Me kan de parmi trwa pli gran parti zwen sa amenn suvan bann gro skor dan elekyson: sa lalians la gagn lao 50 siez. Me pa tu letan (ek sa eleksyon ki pe vini la pa enn eleksyon ordiner ditu sa). An 2005 Ramgoolam ti gagn enn viktwar istorik ler enn gro parti ti bat 2 gro parti.

Anfet telma Sithanen ti fann dal kom minis de finans -- avek so kamwad Ali Mansoor -- ki Ramgoolam finn bizin ed Pravind Jugnauth eli dan No. 8, donn enn segon manda prezidan SAJ pu finalman fer lalians ek MSM ek pa donn tiket Sithanen. Parksi Ramgoolam ti kone si ti donn li tiket kitfwa Ramgoolam mem ti pwal manz feyaz. Sithanen pann gagn tiket ar Berenger usi byen ki Berenger -- papa kominalis syantifik sa do -- ti dir ki Ramgoolam finn fer fos ek bann Tamul-morisyen parski Berenger kone ki elekter pa kas latet ar kominote bann faner dal.

Sithanen finn osi dir 2 zafer interesan: enn linn sov lekonomi (pa fer u riye sa?) ek de ki depi 2010 li tianvi ki travayis fer lalians ek MMM. Se mari kontradiktwar sa parski si li finn sov lekonomi alor Ramgoolam se sirma enn gro zozo kinn al fer lalians ek MSM apre so gran viktwar an 2005 u ki ti bizin al fer lalyans ek MMM. Lot zafer se ki si vremem li ti sov lekonomi abe ki fer MMM pann pran li kom kandida ubyen linn al poze kuma indepandan. Parski ena sirkonskripsyon finn deza donn estra mari buku vot sympati: sa lao trez mil vot ki Raj Dayal ti gagn an 2000 -- si ankor 289 dimunn ki ti vot Daureeawoo ti vot Dayal li ti pu rant dan parlman -- se an sympati petet pu enn "unfair dismissal". Anplis Sithanen dir ki selon enn model elektoral robist ki linn develope bann morisyens vot sirtu lor ban baz kominal. Rezon de plis pu ki li ti poze kom indepandan. Ek fode pa bliye ki Ali Mansoor -- ki dir linn resi truv sat Mao -- ti pu kav petet vinn so campaign manager dan katborn.

2. Si li tienn kosmar pu popilasyon abe Pravind Jugnauth pann nome Minis de Finans dan lalians lepep parski lienn inkonpetan. Bon seki nu pe analize la se eski Sithanen enn kosmar pu la popilasyon. Me les nu dir enn zafer: buku dimunn ti apresye ler Pravind ti ranvers plizir bann mizir pagla ki Sithanen ti mete.

3. Si li ti enn kosmar eski sa kantite pei la ti pu invit li pu vinn koz zistis sosyal ek lekonomi. Get sa, bann ex-minis nimport ki pei kapav invite par lezot pei parski zot konn dimunn la etc. Ti pu bon li dir nu si pa so intervansyon ti lor peryod 2005-2010 ek si pa linn dir so lodians ki li pann gagn tiket ek Ramgoolam an 2010 parski li ti tro fann dal. Eski li ti usi montre bann tiart kumsa?

4. Si li tienn kosmar eski buku pei ti pu solisit so lexperians kote stratezi ek zistis sosyal. Ti pu bon li donn nu enn lalis ki sa bann buku pei la ek ki linn sigzer zot parksi nu kone ki isi akoz so gran linkonpetans linn kas enn pake resor nu lekonomi.

An konklizyon Sithanen pir ki enn kosmar.

© Sanjay Jagatsingh, 2014